ఈ నెల 15 నాటికి ప్రపంచంలోని మొత్తం జనాభా 8 బిలియన్లకు చేరుతుందని ఐక్యరాజ్య సమితి తాజా నివేదిక పేర్కొంది. ఇది 1950తో పోలిస్తే మూడు రెట్లు అధికమని తెలిపింది. 2030 నాటికి ఈ సంఖ్య సుమారు 850 కోట్లకు చేరుతుందని అంచనా వేసింది. కాగా, మరో ఏడాదిలో ప్రపంచంలో అత్యధిక జనాభా కలిగిన దేశంగా భారత్ అవతరించనుందని వివరించింది. 2023లో చైనాను భారత్ అధిగమిస్తుందని ఐరాస తన నివేదికలో తెలిపింది.
ప్రధానాంశాలు:
- 2020లో భారీగా పడిపోయిన జనాభా పెరుగుదల
- 2050కి 8 దేశాల్లోనే సగానికిపైగా కేంద్రీకృతం
- 2023 నాటికి చైనాను అధిగమిస్తున్న భారత్.
- 2050 నాటికి అంచనా వేసిన జనాభాలో సగానికిపైగా పెరుగుదల కేవలం ఎనిమిది దేశాల్లోనే కేంద్రీకృతమై ఉంటుందని నివేదిక తెలిపింది. అవి కాంగో, ఈజిప్ట్, ఇథియోపియా, ఇండియా, నైజీరియా, పాకిస్థాన్, ఫిలిప్పీన్స్, టాంజానియా. ప్రపంచ జనాభా 2030లో సుమారు 8.5 బిలియన్లకు, 2050లో 9.7 బిలియన్లకు, ఆపై 2080లలో గరిష్టంగా 10.4 బిలియన్లకు చేరుకుని 2100 వరకు ఆ స్థాయిలోనే ఉంటుందని ఐరాస ఇటీవల అంచనా వేసింది.
మెజారిటీ సబ్-సహారా ఆఫ్రికన్ దేశాలు, అలాగే ఆసియా, లాటిన్ అమెరికా, కరేబియన్‌లోని కొన్ని ప్రాంతాలు ఇటీవలి సంతానోత్పత్తి క్షీణత ఫలితంగా జనాభా వైవిధ్యం ఉందని తెలిపింది. దీని కారణంగా పని చేసే వయస్సు జనాభా నిష్పత్తిలో పెరుగుదల ( 25 నుంచి 64 వయసు) తలసరి వేగవంతమైన ఆర్థిక వృద్ధికి అవకాశాన్ని అందిస్తుంది.
‘‘మన వైవిధ్యాన్ని జరుపుకోవడానికి, మన ఉమ్మడి మానవత్వాన్ని గుర్తించడానికి, జీవితకాలాన్ని పొడిగింపు, మాతాశిశు మరణాల రేటును నాటకీయంగా తగ్గించిన ఆరోగ్యంలో పురోగతిని చూసి ఆశ్చర్యపోవడానికి ఇది ఒక సందర్భం’’ అని ఐక్యరాజ్యసమితి ప్రధాన కార్యదర్శి ఆంటోనియో గుటెర్రస్ వ్యాఖ్యానించారు. ఇదే సమయంలో సుస్థిరత, స్థిరమైన లక్ష్యాల బాధ్యతపై కూడా గుటెర్రస్ ప్రస్తావించారు. ‘‘ఇది మన గ్రహం పట్ల శ్రద్ధ వహించడానికి మన భాగస్వామ్య బాధ్యతను గుర్తు చేస్తుంది.. ఒకరికొకరు మన కట్టుబాట్లను మనం ఇంకా ఎక్కడ కోల్పోతున్నామో ప్రతిబింబించే క్షణం.’’ అని పేర్కొన్నారు.
