రాష్ట్రంలో బీడీఎస్ కన్వీనర్ కోటా సీట్ల భర్తీకి ఈ నెల(నవంబర్) 9,10వ తేదీలలో వెబ్ కౌన్సిలింగ్ నిర్వహించనున్నట్టు కాళోజీ ఆరోగ్య విశ్వవిద్యాలయం తెలిపింది. దీనికి సంబంధించి హెల్త్‌ యూనివర్సిటీ ఇవాళ( మంగళవారం) మొదటి విడత ప్రవేశాలకు నోటిఫికేషన్ విడుదల చెసింది. కాళోజీ ఆరోగ్య విశ్వవిద్యాలయం పరిధిలోని ప్రభుత్వ ప్రైవేటు డెంటల్ కాలేజీల్లోని కన్వీనర్ కోటా సీట్లను ఈ నోటిఫికేషన్ ద్వారా భర్తీ చేయనున్నారు.
తుది మెరిట్‌ లిస్టులోని అర్హులైన అభ్యర్థులు వెబ్ ఆప్షన్లు నమోదు చేసుకోవచ్చు. కాలేజీల వారీగా సీట్ల ఖాళీల వివరాలను యూనివర్సిటీ వెబ్ సైట్లో పొందుపరిచారు. ఈ నెల 9వ తేదీ ఉదయం 6 గంటల నుంచి 10వ తేదీ సాయంత్రం 6 గంటల వరకు ప్రాధాన్యత క్రమంలో కళాశాలల వారిగా వెబ్ ఆప్షన్లు నమోదు చేసుకోవచ్చు. పూర్తి వివరాలకు విశ్వవిద్యాలయ వెబ్‌సైట్ www.knruhs.telangana.gov.inలో చూడాలని యూనివర్సిటీ వర్గాలు తెలిపాయి.
