అమెరికన్ స్పేస్ ఏజెన్సీ నాసా మూన్ మిషన్ ‘ఆర్టెమిస్ 1’ ఇవాళ(బుధవారం) ప్రయోగించారు. ఫ్లోరిడాలోని కెన్నెడీ స్పేస్ సెంటర్ నుంచి భారత కాలమానం ప్రకారం మధ్యాహ్నం 12.17 గంటలకు రాకెట్ చంద్రుని వైపు దూసుకెళ్లింది. ప్రయోగించిన కొన్ని నిమిషాల తర్వాత చంద్రుని వైపు ఓరియన్ అంతరిక్ష నౌకను రాకెట్ ప్రయోగించారు. సోమవారం నాటికి ఓరియన్ చంద్రుడి ఉపరితలం నుంచి 96.5 కిలోమీటర్లు దాటిపోతుంది. దాదాపు 25 రోజులపాటు అంతరిక్షంలో గడిపిన తర్వాత డిసెంబర్ 11న పసిఫిక్ మహాసముద్రంలో పడనున్నది నాసా ఆర్టెమిస్1.
ఆర్టెమిస్1 ప్రయోగం సాంకేతిక లోపాలు, వాతావరణ ప్రతికూలత కారణంగా గతంలో రెండు సార్లు ఆగస్ట్‌ 29, సెప్టెంబర్‌ 3న వాయిదా పడింది. మూడోసారి ప్రయోగం సందర్భంగా కూడా కొన్ని అడ్డంకులు తప్పలేదు. అయితే.. వాటిని అధిగమించి రాకెట్‌ను విజయవంతంగా ప్రయోగించినట్లు నాసా తెలిపింది. రాకెట్‌లో హైడ్రోజన్‌ గ్యాస్‌ లీక్‌ అవుతుండగా శాస్త్రవేత్తలు సకాలంలో దాన్ని సరిచేశారు.
